ចាប់បានត្រីឆ្លាមនៅទន្លេទឹកសាប «វ៉ាមក»? ពលរដ្ឋវៀតណាមជ្រួលច្របល់ អ្នកវិទ្យាសាស្រ្តស្រែកបំភ្លឺ

ចាប់បានត្រីឆ្លាមនៅទន្លេទឹកសាប «វ៉ាមក»? ពលរដ្ឋវៀតណាមជ្រួលច្របល់ អ្នកវិទ្យាសាស្រ្តស្រែកបំភ្លឺ

ក្រោយពេលដែលរូបភាព និងព័ត៌មានពីការចាប់បានត្រីឆ្លាមនៅទន្លេវ៉ាមក (ទន្លេទឹកសាប) ខេត្ត ឡុងអាន បានចែករំលែកពេញបណ្តាញសង្គម ប្រជាពលរដ្ឋជាច្រើនមានការជ្រួលច្របល់ ភ័យខ្លាច ព្រោះបែបនេះ វាអាចវាយលុកពួកគេ ពិសេសក្មេងៗរស់តាមបណ្តោយទន្លេ ។

គណនី Sang nguyen ថ្មីៗនេះ បានបង្ហោះរូបភាពត្រីឆ្លាម១ក្បាលលើបណ្តាញសង្គម អមជាមួយចំណងជើងៈ «ខ្ញុំកំពុងនឹងដេក ពុកហៅខ្ញុំប្រាប់ថា អាញ់ទើបចាប់បានត្រីឆ្លាម១ក្បាល ។ ស្តាប់ហើយ ស្មានតែគាត់និយាយលេង រួចក៏ពឹងប្អូនឲ្យវាថតរូបបញ្ជូនមក ។ ស្រុកថាញ់ហ្វា ក៏មានត្រីឆ្លាមដែរ បងប្អូនអើយ!» ។ តាមគណនីដដែលត្រីឆ្លាមនោះមានទម្ងន់ ៩ គីឡូក្រាម ។ប្រជាពលរដ្ឋនៅតាមដងទន្លេ ចាប់ផ្តើមជ្រួលជ្រើម ព្រោះភ័យខ្លាច ពិសេសកូនក្មួយរបស់ពួកគេតែងចុះងូតទឹកលេងជារៀងរាល់ថ្ងៃ ។សាស្ត្រាចារ្យបណ្ឌិតវិទ្យាសាស្ត្រ ដាំង ហ្វីហ្វិន ប្រធានសមាគមសត្វ ឲ្យដឹងថា ត្រីឆ្លាមជាប្រភេទរស់នៅបរិស្ថានទឹកប្រៃ ពុំមែនទឹកសាបទេ ។ តាំងពីប្រព័ន្ធរាងកាយ លក្ខណៈស្បែក ចំណីអាហាររបស់វា សម្របខ្លួនជាមួយពិភពទឹកប្រៃប៉ុណ្ណោះ ។ ហេតុនេះ សាស្ត្រាចារ្យខាងលើសន្និដ្ឋានថា៖
-ទី១ ប្រសិននេះជារឿងពិត (ត្រូវមានការស៊ើបបញ្ជាក់) អាចថានៅតំបន់នេះ កន្លងមកមានទឹកប្រៃហូរចូល ហើយត្រីឆ្លាមបានហូរតាមខ្សែទឹកនោះមក ។
-ទី២ នេះជាព័ត៌មានបង្កនូវភាពចលាចល ចាំបាច់សមត្ថកិច្ចនៅតំបន់នោះ ត្រូវចុះស៊ើបអង្កេតជាបន្ទាន់ ។